ပဋိပတ္တိသာသနာသမိုင်းတွင် အထင်ကရ ဖြစ်တော်မူသော " စွန်းလွန်း ဆရာတော်ဘုရားကြီး " ဆိုလျှင် စာပေမတတ် သာမန် အညတရ မင်းစေဘ၀ လယ်သမားဘ၀မှ ဓမ္မလမ်းပေါ်သို့ စွမ်းစွမ်းတမံ ပေါက်ရောက်ခဲ့ကာ ရဟန္တာဟု ကျော်ကြားတော်မူခဲ့ပါသည်။
' မြင်- မြင်တယ် ' ' ကြား- ကြားတယ် ' ' နံ- နံတယ် ' ဟု ထင်ရှားရာတိုင်းကို ပေါ်လာတိုင်း ရှုမှတ်သော သတိတစ်လုံးဖြင့် အဆုံးနိဗ္ဗာန် ၀င်ကြရသည်။ မြတ်စွာဘုရားရှင် လက်ထက်တော်က သာဝတ္ထိပြည်သူ ပြည်သားများသည် လူဝတ်ကြောင်ဘ၀ဖြင့် သောတာပန်၊ သကဒါဂါမ်၊ အနာဂါမ် တည်ခဲ့ကြခြင်းသည် မြင်ရာ ၊ ကြားရာ ၊ စားရာ ၊ ထိတွေ့ရာတိုင်းမှာ သတိမကွာ အသိပါခဲ့ခြင်းကြောင့် ဖြစ်ပါသည်။
ဆရာတော် ဦးပဏ္ဍိတက " သူဟာ အသက်ငါးဆယ်ကျော်လောက်မှ လောကီမှာ အားကိုးစရာ မရှိလို့ လောကုတ္တရာကို နှလုံးသွင်းပြီးတော့ အနတ္တတရားကို ရှာခဲ့တာပါ ။ ကိုယ်ဖြစ်နေတာ အတ္တ ၊ အတ္တဆိုတာ စာလိုပြောတာ ၊ အဓိပ္ပာယ်က အစွဲ ၊ ငါ -မြင်တယ် ၊ ငါ - ကြားတယ် ၊ ငါ့ မိန်းမ ၊ ငါ့ သား ၊ ငါ့ လင် ၊ ငါ့ သမီး ဆိုတာ အတ္တတွေက မှတ်သားထားတဲ့ အစွဲ ၊ သညာလို့လည်း ခေါ်တယ် ။ "
" သံသရာ ဘယ်က စလဲ " ကာယကံ ၊ ၀စီကံ ၊ မနောကံ မှာ မနောကံက စ-တယ်။ " သံသရာ ဘယ်မှာ ဆုံးသလဲ " မနောကံမှာ ဆုံးတယ် ၊ ပြတ်တယ် ၊ နိဗ္ဗာန်သည် ခန္ဓာမှာ စ တယ် ။ ( ၀ိပဿနာ တရားများကို စတင် ရှုမှတ်ရတယ် ။ ) ခန္ဓာမှာ ဆုံးတယ် ။ သီလမှာ ချုပ်တယ် ။
ကိုယ်လုပ်တဲ့ အလုပ် ကိုယ်သိရမယ် ။ ကိုယ်လုပ်တဲ့ အလုပ်မှာ အသီးတစ်ရာ အညှာတစ်ခုတဲ့ ။ အသီးတွေ တစ်လုံးချင်း လျှောက်ဖြုတ်နေရင် ကြာတယ် ။ အညှာကိုသာ ဖြုတ်ချလိုက် ၊ အသီးတွေ အကုန်ပါတာပဲ ။ အတွင်းစိတ် မနောလေးဟာ အညှာပဲ ။ စိတ်အညှာ မနောကံ ကိုင်လိုက်ရင် ကာယကံ ၊ ၀စီကံ ( အပြင်သီလတွေ ) အကုန်ချုပ်ရမယ်။ ကျွဲကူးရင် ရေပါတယ်။
ကာယကံ ၊ ၀စီကံ စောင့်ထိန်းထားတဲ့ အပြင်သီလက အတွင်းစိတ် ပူနေတာကို ငြိမ်းအောင် မလုပ်နိုင်ဘူး ။ အတွင်း သီလ ( စိတ်မနော လုံသွား နိုင်သွားတဲ့သူမှ ငြိမ်းအေးမှာ ။
စာထဲရေးထားတဲ့ သစ္စာတရားတွေ သိအောင်လုပ် ၊ စာနဲ့ စိတ်နဲ့ တစ်ထပ်တည်း ဖြစ်မှ သစ္စာ ( အရိယ သစ္စာ ) ၊ စာနဲ့ စိတ် တစ်ထပ်တည်း မဖြစ်သေးရင် သမုတိသစ္စာ ( လောကီ သစ္စာ ) က မလွတ်သေးဘူး ။
မနောကံက ခြေမရှိ ၊ လက်မရှိနဲ့ ကျူးလွန်နေတာ ။ သိပ်ကြောက်ဖို့ ကောင်းတယ် ။ သံသရာလည်စေတာ မနောကံပဲ ။ သံသရာ ပြတ်ချင်ရင် ကံကိုဖြတ် ။ အစွဲကို ဖြတ် ။ စွဲရင် ကံ ၊ မစွဲရင် ဉာဏ် ။ ကံတွေ စွဲနေသမျှ သံသရာ မပြတ်ဘူး ။ မဆုံးဘူး ။
ဒီတော့ တစ်ချက်ခုတ် နှစ်ချက်ပြတ် ၊ သုံးချက်ပြတ်ပဲ ။ မနောဒုစရိုက်တွေ သတ်လိုက်တာနဲ့ ကာယကံ ဒုစရိုက် ၊ ၀စီကံ ဒုစရိုက်တွေ မပြုတော့ဘူး ။ အပြင်စင်ကြယ်သွားရင် အတွင်း စင်ကြယ်တယ် ။ ခန္ဓာ စင်ကြယ်မှ ဉာဏ်စင်ကြယ်တယ် ။ ၀ိပဿနာဆိုတာ ဉာဏ်စခန်း ခေါ်တယ် ။ သမထနဲ့ တင်းတိမ်နေရင် ၀ိဇ္ဇာဓိုရ် ၀ိဇ္ဇာပေါက်ပဲ ဖြစ်မယ် ။ မဂ္ဂင် ရှစ်ပါး လမ်းဆုံးတော့ ဉာဏ်စခန်းရောက်မယ် ။
ကိုရင်ကြီး ရှင်ဝိမလကလည်း " ၀ိပဿနာ အစ သံဝေဂ က...တဲ့ " ဟု လူငယ် ၊ လူရွယ် ၊ လူလတ်ပိုင်း၌ မူးမူးထွေထွေ အမိုက်တိုက်ထဲ မိုက်မဲနေခဲ့သမျှ သူ့အချိန်ကျ၍ ဘ၀ အမှောင် ဖောက်ခွဲ ထွန်းလင်းမည့် အလင်းတန်းကလေး လျှပ်ပြက်သလို ပေါ်ထွန်းလာခဲ့သည် ။ ကြက်သွန်ခင်း စောင့်ဘ၀ တောမီးလောင်ရာမှ ကြွက်ကလေးတွေ ၊ ငှက်ကလေးတွေ ၊ ဖားကလေးတွေ ၊ ရှဥ့်ကလေးတွေ ၊ လိပ်ပြာကလေးတွေ ၊ ဓားတုတ်ကောင် ကလေးတွေရဲ့ သက်တမ်းစေ့ မနေရဘဲ အသေချင်း ထပ်နေသော မရဏဘေး ၊ ဇာတိဘေး ဟူသော သံသရာ ဘေးဆိုးကြီး၏ ကြောက်စရာ ကောင်းလှသည့် သံဝေဂ တရားတို့သည် ၀ိပဿနာ လမ်းသို့ ထွက်မြောက်ရန် ခွန်အားအစစ်များ ဖြစ်လာခဲ့ပါတော့သည်။
ရခဲ့သော သံဝေဂ ဟာ တရားဓမ္မရဲ့ မောင်းနှင်ရေး အားဖြစ်ပြီး ၀င်လေ ထွက်လေ စမှတ်ခဲ့သည် ။ မှတ်စက ကျိုးတိုးကျဲတဲ ၀င်လေ ထွက်လေ ဖွာလန်ကြဲနေသော်လည်း ရွှေကျင်သလို ကျင်ယူခဲ့၍ ၀င် ၀င်မှန်းသိ ၊ ထွက် ထွက်မှန်းသိခဲ့သည် ။ အသိကလေး တစ်ချက် ပေါ်တာနှင့် အေးကနဲ တစ်ချက် ခံစားရသော ၀င်လေ ထွက်လေ ရှုမှတ်ခြင်းသည်ပင် ၀ဋ်ဆင်းရဲ အပေါင်းမှ လွတ်မြောက်ရာလမ်း ဖြစ်လာကြောင်း ကိုရင်ကြီး ရှင်ဝိမလမှ ဟောကြားခဲ့ပါသည်။
ခန္ဓာကြီး ဆိုတာ မွေးကင်းစ ကတည်းက အာရုံတွေနဲ့ မွေ့လျော်ခဲ့တာ အမေ့ရင်ခွင် နူးညံ့တဲ့ အထိအတွေ့ ၊ အိပ်ရာခင်းရဲ့ နူးညံ့တဲ့ အထိအတွေ့ ၊ ချော့သိပ်တဲ့ နာပျော်ဘွယ် တေးသီချင်းသံ ၊ ကြည့်မ၀နိုင်တဲ့ ရောင်စုံအရုပ် ၊ ချိုဆိမ့်တဲ့ အစာအာဟာရ ၊ နှစ်သက်ဖွယ် မွှေးရနံ့ ... စတဲ့ အာရုံငါးပါး ကြားက လူလားမြောက်ခဲ့ကြရတော့ ရုပ် ၊ နာမ် ၊ ခန္ဓာကို အာရုံထဲမှ မရုန်းကန်ချင်ကြ ။ အာရုံဆိုသည်မှာ တဏှာက လက်သပ် မွေးထားခြင်း ဖြစ်သည်။ ကိုရင်ကြီး ရှင်ဝိမလက တရားခံကို မိပြီး မသိမှု အ၀ိဇ္ဇာကို ကိစ္စတုံး စီရင်နိုင်ခဲ့ကာ လားရာ ဂတိမှာလည်း လွတ်မြောက်ရာလမ်းဆီသို့ ဦးတည်နေကြောင်း စာရေးသူမှ အားပျော့နေသူ လူအများအတွက် မဂ္ဂင်လမ်းဖောက်၍ အသိဉာဏ်စခန်းပေါက်စေဖို့ " ဘ၀ကြမ်းမှ ဓမ္မလမ်းသို့ " စာအုပ်ဖြင့် မီးမောင်းထိုး အလင်းဆောင်ပြပေးထားပါသည်။
No comments:
Post a Comment