_____________________________________________________
★ "တဏှာ့ကျေးကျွန်ဘ၀ မှ သာသနာ့ကျေးကျွန်ဘ၀ သို့ "★
______________________________________________________
"ဦနှော လောကော အတိတ္တော တဏှာဒါသော=လောကကြီးသည် တဏှာ အုပ်စိုးသည်"ဟု စာပေကျမ်းဂန်များကဆိုပါ၏။
ထို စာလေးကိုဖတ်လိုက်မိသောအခါ တဏှာ လက်မှလွတ်အောင်ရုန်းတော်မူခဲ့သောရှေးဆရာတော်ကြီးတစ်ပါးကိုသတိရမိ
ပါ၏။ အချိန်ကာလအားဖြင့် မဝေးလွန်းသေးသောအဖြစ်အပျက်ကလေးပါ။
"စစ်ကိုင်းတောင်,တိလောကဂုရုချောင်" မှ "တိလောကဂုရု ဆရာတော်ကြီး"၏ကိုယ်တွေ့ဖြစ်ရပ်ကလေး ဟုဆိုရပါမည်။
အတိအကျဆိုရပါလျှင်"တိလောကဂုရုချောင်"တွင်"ဒုတိယတိလောကဂရု ဆရာတော် အရှင်တေဇောဒီပ"ဘွဲ့အမည်ရ (သုတ္တန်ဆိုင်ရာ အဖွင့်ဖြစ်သည့်"ပရိတ္တဋီကာကျမ်း"ကိုရဟန်း(၅)၀ါအရတွင် ပါဠိဘာသာဖြင့်ကျမ်းပြုခဲ့သည့်)စာပေကျမ်းဂန် တတ် ဂန္တ၀င်ကျော် ဆရာတော်ဖြစ်ပါသည်။"ဒီပဲယင်းမြို့နယ်၊ကန်ဖျားရွာ" ဇာတိဖြစ်ပါ၏။
ဆရာတော်ဘုရားကြီးငယ်စဉ်ကာလ၊ ရဟန်းပျိုဘ၀ တွင်"သာသနာမှာမပျော်ဘူး၊လူထွက်မယ်"ဟုဆုံးဖြတ်၍ "ရွှေစည်းခုံ"
ဘုရားသို့ ကြွသွားခဲ့သည်။ "ရွှေစည်းခုံဘုရား"ရောက်သောအခါ အမျိုးသမီးတစ်ယောက်က ဘုရားရှိခိုးဆုတောင်းနေသည်
ကိုကြားရ၏။သူ၏ဆုတောင်းမှာ"ဘ၀ဆက်တိုင်ဆက်တိုင်း လူမိုက်နှင့်မပေါင်းရပါစေနဲ့"ဟူ၏။
ထို ဆု ကိုသာထပ်တစ်လဲလဲ တောင်းနေသည်ကို ဦးပဉ္စင်းလေးကြားသောအခါ
"လူမိုက်နှင့်မပေါင်းရပါစေနဲ့ ဆိုတဲ့ဆု ဒီဒကာမကြီး ထပ်ချည်းတလဲလဲတောင်းတယ်၊ဘာကြောင့်တောင်းတာပါလိမ့်၊ငါမေး
ကြည့်ဦးမှပဲ"ဟုစဉ်းစားမိ၍-
"ဒကာမကြီး လူမိုက်နှင့်မပေါင်းရပါစေနဲ့၊လူမိုက်နှင့်မပေါင်းရပါစေနဲ့ ဆိုတဲ့ ဆုကို ထပ်ခါတလဲလဲ ဆုတောင်းတယ်၊
လူမိုက် ဆိုတာ ဘယ်လိုလူကိုပြောတာလဲ" ဟုမေးလိုက်၏။
"လူမိုက် ဆိုတာ ဘုန်းကြီး လူထွက်ပေါ့ဘုရား"ဟု ထိုအမျိုးသမီး မှ ပြန်ဖြေသည်။
"ဘာ့ကြောင့် ဘုန်းကြီးလူထွက်ကို လူမိုက်လို့ပြောရတာတုံး"
"ဦးပဉ္စင်း စဉ်းစားကြည့်၊ ဘုန်းကြီးဘ၀မှာ ဘာပူစရာလိုတုန်းဘုရား၊
စားစရာလည်းပူစရာမလိုဘဲ၊၀တ်စရာလည်းပူစရာမလိုဘဲ၊နေစရာလည်းပူစရာမလိုဘဲ၊ ချွေးဒီးဒီး ကျအောင် ဘာမှလုပ်စရာမလိုဘူး၊
ဒကာ,ဒကာမတွေက ဆွမ်း,သင်္ကန်း,ကျောင်း, ဆေး ဆိုတဲ့ပစ္စည်း(၄)ပါးဖြင့် ထောက်ပံ့နေကြတာ၊ကိုယ့်တရားကို အေးအေးဆေးဆေး အားထုတ်ရုံပဲ ဘုရား။
ဒီလို အပူအပင်ကင်းတဲ့ ဘုန်းကြီးဘ၀မှာ သာသနာ ကိုလုပ်ကျွေးပြုစု မနေဘဲ သူများ သားသမီးကိုယူပြီး ကာမဂုဏ်ရဲ့
ကျေးကျွန်အဖြစ်နဲ့လုပ်ကျွေးဖို့ ဒုက္ခသိပ်များတဲ့ လူ့ဘောင်လူ့လောက ကို ပြန်လာတာဆိုတော့ ဘုန်းကြီးလူထွက်လောက်
မိုက်တဲ့ လူမိုက် ဒီလောကမှာ မရှိဘူး၊ အဲဒါကြောင့် ဘုန်းကြီးလူထွက်ကို လူမိုက် လို့ပြောတာဘုရား"
"ဘာ့ကြောင့် ဘုန်းကြီး လူထွက်နဲ့ မပေါင်းချင်ရတာလဲ"
"တပည့်တော် ယောက်ျားက ဘုန်းကြီးလူထွက်ဘုရား၊ဒါကြောင့် ဘုန်းကြီးလူထွက်အကြောင်းကောင်းကောင်းသိတယ်၊
အဲဒီလို သိလို့ မပေါင်းချင်တာ"
"အဲဒီ ဘုန်းကြီးလူထွက် က တော်တော်ဆိုးသလား၊သူ့အကြောင်းကို နည်းနည်းလောက် ပြောပြစမ်းပါ"
"ထမင်းစားမယ် ဆိုရင် တကတဲ စားပွဲနားမှာတင်ပျဉ်ခွေကြီးနဲ့ထိုင်နေတယ်ဘုရား၊
ဘာမှ ၀ိုင်းမလုပ်ဘူး၊ ဘုန်းကြီးဘ၀က အကျင့်အိမ်ထိပါလာတယ်၊ ထမင်းဟင်းခူးခပ်ပြီးတော့ယူသွားရင်လည်း
ဘုန်းကြီးဘ၀က အကပ်ခံနေကြဆိုတော့ လက်ကြီးနဲ့ ထိုးထိုးခံတယ်ဘုရား၊
ကလေးချီတော့လည်း အချိုးက မကျဘူးဘုရား၊ဘုန်းကြီးဘ၀က သပိတ်ပွေ့ခဲ့တာဆိုတော့ လက်ကိုဆန့်ထုတ်ပြီးတော့
ကလေးကိုချီတယ်၊ ကလေးချော့တော့လည်းအဆင်မပြေဘူး၊စာအံ သလိုပဲဘုရား၊
ဘုန်းကြီးလူထွက် အချိုးမပြေတာတွေပြောမယ်ဆိုရင် အများကြီးပဲ၊အဲဒါကြောင့် ဘုန်းကြီးလူထွက်နဲ့မပေါင်းချင်တာဘုရား"
ဟု ရှင်းပြသောအခါ "တိလောကဂုရုဆရာတော်လောင်းလျာ ဦးပဉ္စင်းလေး"သည် သတိ,သံဝေဂများရ၍ဆုံးဖြတ်ချက်တစ်ခု
ချလိုက်လေ၏။
"ငါ လူထွက်လို့ မဖြစ်တော့ဘူး၊ ထွက်ရင် ငါ လူမိုက်ဖြစ်တော့မှာ၊ဒီတော့ သာသနာ့ဘောင်မှာပဲနေပြီး သာသနာ့အလုပ်ကို
လုပ်တော့မယ်" ဟုဆုံးဖြတ်ကာ-သူ့တွင်ပါလာသည့် ပုဆိုး၊အင်္ကျီ များကိုစွန့်ပစ်လိုက်သည်။စွန့်ပစ်ပြီးနောက်ဘုရားရှိခိုး၏။
ဘုရားထံတွင်"ငါသည် လူမိုက်မဖြစ်ပါရစေနဲ့" ဟုဆုတောင်းပါသည်။
ထိုနောက် ကျောင်းပြန်လာ၏။စာပေကိုကြိုးစားသင်၏။စာတတ်လာသောအချိန်တွင် ရဟန်းသံဃာများကို စာဝါပျားပို့ချ၏။
စာဝါချ အလွန်ကောင်း၏။စာမည်မျှတတ်သနည်းဆိုလျှင်(အထက်တွင်ရေးပြီးခဲ့သလို)ရဟန်းဝါ(၅)၀ါအရတွင်ပါဠိဘာသာ
ဖြင့် "ပရိတ္တဋီကာကျမ်းကြီး"ကိုပြုစုတော်မူခဲ့၏။
တိလောကဂုရုဆရာတော် စာဝါချကောင်းပုံ,ကျမ်းဂန်များပြုတော်မူပုံ,အနေအထိုင်ကောင်းပုံကို သိရသောအခါရာတော်ကြီး
အား "တိလောကဂုရု"ဘွဲ့တံဆိပ်တော် ဆက်ကပ်ခံရပါသည်။
တဏှာ့ကျေးကျွန်ဘ၀ မှ လွတ်အောင်ရုန်းပြီး သာသနာ့ကျေးကျွန်ဖြစ်အောင်ကြိုးစားတော်မူခဲ့သော ဆရာတော်ကြီးအား
ရိုသေကြည်ညိုစွာ ဤစာစုငယ်လေးဖြင့် ကန်တော့လိုက်ပါ၏။
ရေးသားပြီးစီး။ ။ ၁၃၇၆ခုနှစ်၊၊၀ါခေါင် လဆုတ်(၄)နေ့၊(၁၄-၈-၂၀၁၄)ရက်နေ့၊ကြာသပတေးနေ့-(နံနက်-၈း ၃၃)
ချမ်းသာပါကြစေ၊အေးငြိမ်းကြပါစေ၊
သံသရာဝဋ်ဆင်းရဲမှ..လွတ်မြောက်နိုင်ကြပါစေ။
ဘ၀တုသဗ္ဗမင်္ဂလံ
သင့်
ကလျာဏ မိတ္တ
(ကိုညီညီတင်)
(09-445108754)
No comments:
Post a Comment