______________________________________
★"အမှား မကြာခင် ၊ အမှန် ပြင် ကြစေဖို့" ★
_______________________________________
ကျွန်တော် တို့ ဗုဒ္ဓဘာသာဝင်များဟူသည် "ပါဠိတော်" နှင့်ကင်း၍ မရပါ။ဘုရားရှိခိုးခြင်း၊ဂုဏ်တော်ပွားခြင်း၊ပရိတ်ရွတ်ခြင်း စသောကိစ္စတို့၌ ပါဠိတော် နှင့် ကြုံတွေ့ရလေ့ရှိပါသည်။
ရံဖန်ရံခါ လေ့လာမှုအားနည်းသည့်အခါတွင်မူ "ပါဠိတော်"အသံထွက်များကို မှားယွင်းသုံးနှုန်းပြောဆိုတတ်ပါသည်။
ဥပမာအားဖြင့်-
"အရုဏ်" နှင့် "အာရုံ"။ "သဒ္ဓါ" နှင့် "သဒ္ဒါ"။
"အရုဏ်ဆွမ်း၊ အရုဏ်တက်ချိန်" စသဖြင့် ရေးရမည့်အစား "အာရုံဆွမ်း၊အာရုံတက်ချိန်" ဟုရေးမိလျှင် အဓိပ္ပါယ် မရှိဖြစ်တတ်ပါသည်။
"စေတနာ သဒ္ဓါတရား"ဟုရေးရမည့်အစား "စေတနာ သဒ္ဒါတရား" ဟုရေးမိလျှင်လည်း အဓိပ္ပါယ်မရှိဖြစ်သွားပါသည်။
အထက်ပါ အသုံးအနှုန်း ကိုပိုမိုရှင်းလင်း နားလည် သဘောပေါက်အောင် တင်ပြရမည်ဆိုလျှင်-
"နိဗ္ဗာန်" ကို "အာရုံ" ပြု၍ "အရုဏ်ဆွမ်း"ဆက်ကပ်ပါသည်။
"သဒ္ဓါ တရား" ထက်သန်စွာဖြင့် "သဒ္ဒါစာအုပ်"တစ်အုပ်လှူဒါန်းပါသည်။
ပရိတ်ကြီး(၁၁)သုတ်တွင် "မင်္ဂလသုတ်" နှင့်"မေတ္တသုတ်"တို့သည် လူအများ ရွတ်ဆိုပူဇော်ခြင်းအများဆုံးဖြစ်သည်ကို စာဖတ်သူ ဓမ္မမိတ်ဆွေ သိပြီးဖြစ်ပါသည်။နော့ပေတဲ့ "မင်္ဂလသုတ်" ကို "မင်္ဂလာသုတ်"ဟု မရွတ်ဆိုကြပဲ "မေတ္တသုတ်" ကိုမူကား "မေတ္တာသုတ်" ဟု ပြောဆို၊ ရွတ်ဆိုကြပါ၏။
"မေတ္တသုတ်" ကို "မေတ္တာသုတ်" ဟုရွတ်ဆိုကြရာ၌ "မစ်တာသုတ်"ဟုဆိုလျှင်တော်ပါသေး၏။ "မြစ်တာသုတ်"ဟု ရွတ်ဆိုလျှင်ကား ပို၍ အဆင်မပြေလှပါ။
"သဝေ လည်းထိုး၊တသတ်မျိုး၊ ဖတ်ရိုး စ သတ်သံ" ဟုလင်္ကာလေးတစ်ပုဒ်ရှိပါသည်။ "သေတ္တာ" ကို "သစ်တာ" ဟု ဖတ်သကဲ့သို့ "မေတ္တာ"ကို "မစ်တာ"ဟု ဖတ်ရပါသည်။
"မေတ္တာ"ကို "မြစ်တာ" ဟုဖတ်မိ၊ရွတ်မိသဖြင့် နောက်ဆက်တွဲ ရှုပ်ထွေးမှုလေးတစ်ခုကို တင်ပြလိုပါသေးသည်။
"မိဘ၀တ်"လင်္ကာ ၏ အစ တွင်"မကောင်းမြစ်တာ၊ကောင်းရာညွှန်လတ်" စသဖြင့် ရေးသားထားပါသည်။
ထိုအခါ "မေတ္တာ"ကို "မြစ်တာ"ဟု ဖတ်သူများအဖို့ "မကောင်း မေတ္တာ ၊ကောင်းရာညွှန်လတ်"ဖြစ်ရချေတော့မည်။
"မကောင်းသော မေတ္တာ ဖြင့် ကောင်းရာ ညွှန်ပြသည်"ဟုအဓိပ္ပါယ်ကောက်လွဲတော့၏။
ထို အလင်္ကာ ကို အချို့သောစာအုပ် ၌-"မကောင်း မြတ်တာ"ဟုတွေ့ရပြီး အချို့စာအုပ်တွင်မူ"မကောင်း မြစ်ထာ"ဟုတွေ့ရပါသည်။ အချို့ စာအုပ်တွင်မူ"မကောင်း မြစ်တား"ဟုလည်းတွေ့ရပါသည်။
"မြစ်တာ" နှင့်"မြစ်ထာ" မှာ အဓိပ္ပါယ် သဘောသွားအတူတူပင်ဖြစ်ပါ၏။"တားမြစ်ခြင်း" ကိုဆိုလိုပါသည်။
"မြစ်" ဟူသည်မှာ"တားဆီးခြင်း"သဘောဖြစ်ပါ၏။"မြစ်ရေ" တို့သည် ကုန်းမြေနှစ်ခု ကို တားဆီးထားတတ်ခြင်းသဘောရှိ
သောကြောင့် "မြစ်"ဟုခေါ်ပါ၏။
အမျိုးသမီးအဆိုတော်တစ်ဦး က ဘုရားဂုဏ်တော်များကိုပူဇော်သည့် ဓမ္မတေးတစ်ပုဒ်၌ ဂုဏ်တော် တစ်ခုကိုရွတ်ဆို ပူဇော်ရာတွင် အသံထွက်မှားထားပါသည်။
"သတ္ထာ ဒေ၀ မနုဿနံ" ဟူသော ဂုဏ်တော် ကို ရွတ်ဆိုပူဇော်သောအခါ အသံထွက် အမှန်"သတ္ထာ" (သတ်ထာ) ဟုရွတ်ဆိုရမည့်အစား"သတ္တာ"(သတ်တာ) ဟု အသံထွက်မှားခဲ့ပါသည်။
"သတ္ထာ(ဆရာ) ၊ ဒေ၀(နတ်) ၊ မနုဿ (လူ)။"
"သတ္ထာ ဒေ၀ မနုဿာနံ" လူ၊နတ် တို့၏ ဆရာမြတ်အစစ် ဖြစ်တော်မူပေသော မြတ်စွာဘုရား။
ထို့ကြောင့်"သတ္ထာ"(သတ်ထာ) ကို "သတ္တာ"(သတ်တာ) ဟုရွတ်ဆိုမိလျှင် အဓိပ္ပါယ်လုံးဝ ပျက်စီးသွားပါမည်။
ဆက်လက်တင်ပြလိုသည်မှာ-
ဗုဒ္ဓဘာသာ ၀င်များ၏ အတိုဆုံး နှင့် အတွင်ကျယ်ဆုံး ဘုရားရှိခိုး တစ်ခုကို မှားယွင်း ရွတ်ဆိုမှုဖြစ်ပါသည်။
အများအားဖြင့် အသံထွက် မမှားကြပါ။ နော့ပေတဲ့ အဖြတ်အတောက်၊မှားယွင်းတတ်ကြသည် ကများပါ၏။
"ဥဒါန်းတင် ဘုရားရှိခိုး"ဟုလည်း ခေါ်ဆိုသော-"နမော တဿဘဂ၀တော အရဟတော သမ္မာသမ္ဗုဒ္ဓဿ"ဖြစ်ပါ၏။
ယင်း ဘုရားရှိခိုး၌ "ဘဂ၀ါ,အရဟံ,သမ္မာသမ္ဗုဒ္ဓ" ဟူသော "ဂုဏ်တော်ကြီး(၃)ပါး" ပါဝင်နေသည်ကိုသတိပြုရပါမည်။
ရွတ်ဖတ်ပုံ အမှန် က ဤသို့ဖြစ်ပါသည်။
"နမော" ဟုဆိုပြီး ခဏ ရပ်ပါ။
ပြီးမှ "တဿ ဘဂ၀တော" ဟုဆိုပါ။
ပြီးမှ "အရဟတော"။
ပြီးမှ "သမ္မာသမ္ဗုဒ္ဓဿ" ဟုရွတ်ဆိုရပါမည်။ "ဥဒါန်းတင်ဘုရားရှိခိုး" ဖြစ်သဖြင့် (၃)ကြိမ်(၃)ခါ ရွတ်ဆိုရပါသည်။
"နမော" နှင့် "တဿ" ကိုတွဲ၍မဆိုရပါ။
"တဿ" နှင့် "ဘဂ၀တော" ကိုတွဲဆိုရပါမည်။
လူအများသည် "နမောတဿ"ဟု တစ်ဆက်တည်း ဆိုလေ့ရှိပါသည်။ဤသို့ မှားယွင်းကြရာ၌ အချို့ကား နားမလည်၍ မှားတတ်ကြပါသည်။ အချို့ကား နှုတ်ကျိုး နေ၍ မှားတတ်ပါသည်။
"နမော" ဟူသည်"ရှိခိုးပါ၏" ဟုအဓိပ္ပါယ်ရပါသည်။"တဿ" ဟူသည်ကား "ဗုဒ္ဓမြတ်စွာဘုရားရှင်"နှင့် ဂုဏ်တော်များ ကို ညွှန်းဆိုသော"ထို"ဟု အဓိပ္ပါယ်ရပါသည်။
အနက်ဖွင့်ဘုရားရှိခိုးကို လေ့လာကြည့်စေလိုပါသည်။
"နမော တဿ ဘဂ၀တော အရဟတော သမ္မာသမ္ဗုဒ္ဓဿ"(သုံးခေါက်)
အရဟတော=ဗြဟ္မာ၊နတ်၊လူ ခပ်သိမ်းသူတို့ ၊ အပူဇော် မှန်သမျှ၊ အလှူတော်ခံတော်မူထိုက်ပေထသော။
သမ္မာသမ္ဗုဒ္ဓဿ=သစ္စာ လေးတန် ၊တရားမှန် ကို ၊ ဆရာ မရှိ၊ ကိုယ်တော်တိုင် သိတော်မူပေထ သော။
တဿ ဘဂ၀တော= ထို ဂုဏ် အပေါင်းသခင် ဘုရားရှင် ကိုယ်တော်မြတ်ကြီး အား။
နမော=ဂုဏ်တော် ကိုးအင်၊ စိတ်မှာ ထင်လျှက်၊ ယုံကြည် မြတ်နိုး၊ လက်စုံမိုး၍ ၊ ရှိခိုး ကန်တော့အပ်ပါ၏ မြတ်စွာဘုရား။
ဤမျှ ဆိုလျှင်"နမောတဿ" လား ၊"နမော" "တဿ ဘဂ၀တော" လား ဟူ၍ ကွဲပြားခြားနာ သိအပ်ပါပေပြီ။
ထပ်မံတင်ပြလိုသည့် မှားယွင်း အသံထွက်နေမှု တစ်ခုမှာ-
"ငါးပါးသီလ" ၏ ဒုတိယမြောက် သိက္ခာပုဒ်တော် ဖြစ်သည့် "အဒိန္နာဒါနာ ဝေရမဏိ သိက္ခာပဒံ သမာဒိယာမိ"ဖြစ်ပါ၏။
"အဒိန္နာ ဒါနာ" ကို "အဒိန္န ဒါနာ" ဟု "ရေးချသံ" မပါပဲ ရွတ်ဆိုသောအခါ မည်သည့်အဓိပ္ပါယ်မှ မရှိတော့ပါ။
ဗုဒ္ဓသာသနာတော် ကို အထက်တန်းကျကျ၊မျက်နှာပန်းလှလှ ဖြစ်စေလို၍ ဤကဲ့သို့သော ကိစ္စ ကို အသေးအဖွဲဟု မထင်စေလိုပါ။ အလွန်အရေးကြီးလှသော ကြောင့် တင်ပြရခြင်းဖြစ်ပါသည်။
"ဒုကနိပါတ်"၊"အင်္ဂုတ္တိရ် ပါဠိတော်" ၌ "ဗုဒ္ဓမြတ်စွာဘုရားရှင်" ကိုယ်တော်တိုင် သတိပေးစကား မြွက်ကြားချက် နှင့် ဤ ဓမ္မဆောင်းပါးကို နိဂုံးချုပ်ပါမည်။
"ရဟန်း တို့-
ဤ တရား နှစ်မျိုးတို့သည် သူတော်ကောင်းတရား ဟု ဆိုအပ်သော ငါဘုရား ၏ သာသနာတော် ကို ပျက်စီးခြင်းငှာ၊ ကွယ်ပသွားခြင်းငှာ ဖြစ်ကုန်၏။"
"အဘယ် နှစ်ပါးတို့နည်း ဟူမူကား-
"အက္ခရာ"၊ "ပုဒ်"၊ "ဗျည်း" ကို မှားယွင်းစွာ ထားခြင်း လည်း တစ်မျိုး။
ဆိုလိုသော အနက်အဓိပ္ပါယ် ကို အသိရခက်ခြင်း လည်း တစ်မျိုး။
ဤ နှစ်မျိုး တို့ပေတည်း။" ဟူ၍ ဖြစ်ပါ၏။
"အမှား" မကြာခင် "အမှန်" ပြင်နိုင်ကြပါစေသတည်း။
ရေးသားပြီးစီး။ ။ ၁၃၇၆ခုနှစ်၊၊၀ါခေါင် လဆန်း၊ (၁၀)ရက်နေ့၊(၅-၈-၂၀၁၄)ရက်နေ့၊အင်္ဂါနေ့-(နံနက်-၁၀း ၂၀)
ချမ်းသာပါကြစေ၊အေးငြိမ်းကြပါစေ၊
သံသရာဝဋ်ဆင်းရဲမှ..လွတ်မြောက်နိုင်ကြပါစေ။
ဘ၀တုသဗ္ဗမင်္ဂလံ
သင့်
ကလျာဏ မိတ္တ
(ကိုညီညီတင်)
(09-445108754)
★"အမှား မကြာခင်အမှန် ပြင် ကြစေဖို့" ★
No comments:
Post a Comment