အရှင်ဘုရားဒီကနေ့ဗုဒ္ဓကမ္ဘာမှာအရှင်ဘုရားရေးထားတဲ့အရွယ်လွန်အိုမင်းသောမိဘများကိုလုပ် ကျွေးသင့်ခြင်း အကြောင်း ကိုဖတ်ရတဲ့အတွက်အလွန်ဘဲဝမ်းမြောက်မိပါတယ်။ တပည့်တော်မှာလည်း သက်ရှိထင်ရှား အရွယ်အိုမင်းနေသောမိဘနှစ်ပါးလုံးရန်ကုန်မှာရှိပါတယ်။ တပည့်တော်ဟာတဦးတည်းသောသားဖြစ်တဲ့အပြင်မိဘနှစ်ပါးကိုအနီးကပ်ပြုစုစောင့်ရှောက်ချင်ပေမယ့် အခြေအနေအရ တိုင်းတပါးမှာပိုက်ဆံရှာရင်း ဘ၀တိုးတက်လမ်းကိုရှာဖွေနေရပါတယ်။
အရင်တခါက တပည့်တော်လျှောက်ခဲ့ဘူးသလို တခုကိုလိုချင်ရင်တခုကို ပေးဆပ်ရသလို
တပည့်တော်မှာ မိဘနှစ်ပါးနှင့် အနေဝေးနေရပါတယ်။ ကိုယ့်ကိုကိုယ်လည်း လောကီတဏှာနွံထဲကျွံနေတဲ့လှည်းဘီးကြီးလိုခံစားရပါတယ်။
*မိဘကျေးဇူးကိုတရားဖြင့်ဆပ်ခြင်းသည်အကောင်းဆုံးကျေးဇူးဆပ်နည်းဟုဖတ်ရှုမှတ်သားရပါ သည်။တပည့်တော်တို့လိုပုထုဇဉ်လူသားတွေအနေနဲ့မည်ကဲ့သို့ထိထိရောက်ရောက်မိဘ ကျေးဇူးကိုဆပ်ရမည်ကိုသိလိုပါသည်ဘုရား။အရှင်ဘုရားဂရုဏာရှေ့**ထားဟောကြားပေးတော်မူပါဦးဘုရား။*
ရိုသေလေးစားစွာဖြင့်မင်းမင်း
ဒကာကြီးမင်းမင်း..ဒကာကြီးရဲ့မေးခွန်းလေးကိုပြန်ဖြေလိုက်ပါတယ်။မိဘကျေးဇူးဆပ်နည်း(၂)မျိုးကို
ဦးစွာမှတ်ထားပါ။နံပါတ်(၁)ကပစ္စည်းဥစ္စာဖြင့်ကျွေးမွေးပြုစုပြီးကျေးဇူးဆပ်နည်းရယ်။ (၂)ကတရားဓမ္မနှင့်ကျေးဇူးဆပ်နည်းဆိုပြီး(၂)မျိုးရှိပါတယ်။ထို(၂)မျိုးအနက်ကတရားဓမ္မနဲ့ကျေးဇူးဆပ်တာကအကောင်းဆုံးကျေးဇူးဆပ်နည်းဖြစ်တယ်ဆိုတာမှန်ပါတယ်။ဘာလို့လဲဆိုတော့တရား ဓမ္မနဲ့ကျေးဇူးဆပ်တာက တစ်ဘဝကောင်းစားဖို့မဟုတ်ဘဲတစ်သံသရာလုံးကောင်းစားဖို့ ဖြစ်တာကြောင့် တရားဓမ္မနဲ့ကျေးဇူးဆပ်ခြင်းကအကောင်းဆုံး အမြင့်မြတ်ဆုံးလို့ ဆိုလိုခြင်း ဖြစ်ပါတယ်။အနည်းငယ်ရှင်းပြရရင်တရားဓမ္မနဲ့ကျေးဇူးဆပ်တယ်ဆိုတာကလှူဒါန်းမှုဆိုတဲ့(ဒါန)အကြောင်းမသိသေးသောမိဘများ၊လှူဒါန်းမှုဆိုတဲ့ ဒါနအကြောင်းကိုသိပင်သိငြားသော်လည်း မပေးချင်မကမ်းချင် မလှူချင် မတန်းချင် သဒ္ဒါတရားမရှိတဲ့မိဘများ။ထိုထိုမိဘများကိုဒါနအကြောင်းသိလာအောင်ရှင်းပြပေးတာမျိုးဖြစ်ပါတယ်။လှူချင်၊တန်းချင်၊စိတ်ဖြစ်လာအောင်ဒါနအကျိုးတရားကိုပြောပြပေးပါမယ်။
သဒ္ဓါတရားတွေ ထက်သန်လာအောင်ပြောပြပေးခြင်းမျိုးကိုပြုလုပ်ရပါမယ်။ထို့ပြင် ဥပုသ်သီလမစောင့်သုံးချင်သောမိဘများကိုစောင့်သုံးချင်လာအောင်ပြောပြပေးရမယ်။တရားအားမထုတ်ချင်သူမိဘများကိုတရားအားထုတ်ချင်လာအောင်ပြောပြပေးပါမယ်။တရားနာမှုကိုစိတ်မဝင် စားသောမိဘများကိုတရားနာချင်လာအောင်ပြောပြပေးရပါမယ်။ထိုသို့ပြုလုပ်ခြင်းသည်တရားဓမ္မ နှင့်ကျေးဇူးဆပ်ခြင်းလိုခေါ်ပါတယ်။ဒါကတစ်ဘဝ ကောင်းစား ရုံမက သံသရာအဆက်ဆက်ကောင်းစားရေးကိုဦးတည်နေတာဖြစ်တဲ့အတွက်အမြင့်မြတ်ဆုံးကျေးဇူးဆပ်နည်းလို့ခေါ်ပါတယ်။တတ်နိုင်သလောက်ပြောပြပေးစေလိုပါတယ်။
နောက် ပစ္စည်းဥစ္စာနဲ့ကျေးဇူးဆပ်နည်းက မိမိရှာဖွေလို့ရတဲ့ငွေကြေး အသပြာကိုမိမိအတွက်၊မိမိသားသမီး၊ဇနီးအတွက်သာမကမိဘများကိုလည်းလှူဒါန်းခြင်းမျိုးကို ပစ္စည်းဥစ္စာဖြင့်ကျေးဇူးဆပ်တယ်လို့ဆိုရမှာပါ။မြတ်စွာဘုရားရှင်အလောင်းတော်ကျေးမင်းဘဝစတဲ့ဘဝများစွာံမှာ မိဘကျေးဇူးကိုပစ္စည်းဥစ္စာနဲ့ပေးဆပ်ခဲ့တဲ့ဇာတ်ဝတ္ထုများစွာ ရှိနေတဲ့အတွက် ရှာဖွေစားသောက်နိုင်စွမ်းမရှိတဲ့မိအိုဖအိုတို့ကိုတတ်စွမ်းသမျှကျေးဇူးဆပ်တာအကောင်းဆုံးပါ။မြတ်စွာဘုရားရှင်ဘုရားဖြစ်တော်မူပြီးအဘိဓမ္မာဒေသနာတော်ကို တာဝတိံသာ နတ်ပြည်ကိုတက်ပြီးဟောတော်မူခဲ့တာဟာမိခင်ဖြစ်ဖူးခဲ့တဲ့သန္တုဿိတနတ်သားကိုကျေးဇူးဆပ်တဲ့အနေနဲ့ဟောတော်မူခဲ့တာပါ။ဒါကအထင်ရှားဆုံးဥပမာတစ်ခုပါ။
ဒါကြောင့် ဒကာကြီးမင်းမင်းလည်း လုပ်ကိုင်စားသောက်နိုင်စွမ်းမရှိတဲ့မိခင်အို ဖခင်အိုတို့ကို မြတ်စွာဘုရားရှင်ကျင့်သုံးတော်မူခဲ့သည့်အတိုင်းပစ္စည်းဥစ္စာနဲ့ရောတရားဓမ္မနဲ့ပါကျေးဇူးဆပ်နိုင်မည်ဆိုပါကအလွန်ပင်ကောင်းမွန်ကြောင်းအကြံပြုပါရစေ။မိဘကိုလုပ်ကျွေးတဲ့သားသမီးများဟာ အသက်ရှည်ခြင်း၊ချမ်းသာကြီးခြင်း၊ဘုန်းကံကြီးမားခြင်း၊သူတော်ကောင်းများချီးမွမ်းခြင်း။ဘေးဒုက္ခအပေါင်းမှကင်းလွတ်ခြင်း၊စတဲ့အကျိုးများစွာကိုရစေနိုင်ပါသည်ဟုဖြေကြားလိုက်ရပါသည်။
ကျန်းမာချမ်းသာပါစေ။မိဘကျေးဇူးကိုအသက်ထက်ဆုံးပေးဆပ်နိုင်ပါစေဟုဆန္ဒပြုလျှက်။
အရှင်ဝိမလဝံသ(နာလန္ဒာတက္ကသိုလ်)
No comments:
Post a Comment