ဗုဒ္ဓဘာသာ ယဉ်ကျေးမှု အသိပညာပေးဆောင်ပုဒ်များ (၅) ။

“ ရှင်မဟာသီလ၀ံသ ဆုံးမစာ (၄) ”
====================
၃၈။ ဆရာနေခင်း၊ အင်းပျဉ်ညောင်စောင်း၊
လဲလျောင်းဘုံလျှို၊ ထိုထိုထက်မှာ၊
မနေရာသည်၊ မြင့်ရာမသင့်၊ မထိုင်နှင့်။
၃၉။ ရှေ့ကစူးစူး၊ ဒူးလက်ကိုထောင်၊
ထိုင်ဆောင့်ကြောင်နှင့်၊ ပေါင်ထောင် လက်ကား၊

အပါးကြပ်ကြပ်၊ မနေအပ်။
၄၀။ ရှင်နှင့် သူငယ်၊ သောက်ရေအိုးကို၊
တခြားတည်၊ သုံးဖွယ်မသင့်၊
ကျောင်းဦးရေကို မသောက်နှင့်။
၄၁။ ကြီးသူငယ်သူ၊ ရှင်လူက စ၊
ဟူသမျှလည်း၊ မိဘဆရာ၊
ဘယ်မှာမမှတ်၊ ယုတ်မြတ်မသိ၊
ကျိုးမရှိဘဲ၊ မိမိကိုသာ၊
ထောမနာလျက်၊ ဆထက်လွန်စွာ၊
တို့သူငါကို၊ မပါမည်လား၊
ဘယ်ခန့်ညားဟု၊ တုတုပပ၊
ပြစ်မှားကြလျှင်၊ မိဒဏ်ဘဒဏ်၊
ဆရာ့ဒဏ်ကို၊ ခံရလိမ့်မည် မယွင်းစွ။
၄၂။ ရဟန်းသံဃာ၊ အရိယာကို၊
လူသာမဏေတို့၊ ကြို့ကြို့ငဲ့ငဲ့၊
ကဲ့ရဲ့ကျီစား၊ လှည့်စားမပြု၊
တုဖက်မဆို၊ ရိုသေကြစေ၊
မြွေပွေးမြွေဟောက်၊ မထိစောက်သို့၊ ရွံ့ကြောက်စေ။
၄၃။ မွေတော်ဓါတ်တော်၊ ရုပ်တုတော်ကို၊
ဖူးမြော်မပြတ်၊ ရှေ့ကျောင်းဦးမှာ၊
ဖြည့်ကြ၀တ်တက်၊ နံနက်မိုးသောက်၊
ချိန်ခါရောက်သော်၊ ၀တ်လျှောက်မပျက်၊
လက်အုပ်တင်ထား၊ ဘုရား တရား သံဃာ၊
ရတနာသုံးပါး၊ ဂုဏ်တော်များကို၊
ကြိုးစားလုံလ၊ ဆောက်တည်ကြ။
၄၄။ ငါကားသည်စာ၊ သည်ဂါထာကို၊
မြဲစွာကြပ်မတ်၊ ဆရာအပ်သော်၊
တတ်လှစေချင်၊ ငါ့ကိုသင်ဟု၊
ထိပ်တင်လည်းရွက်၊ လျင်လျင်ရအောင်၊ ကြိုးစားကျက်။
၄၅။ အချိန်တန်၍၊ စာအံဆိုလျှင်၊
မရွှင်မျက်နှာ၊ မသာမချို၊
ထိုထိုအကြံ၊ ကြီးစွာဖန်၍၊
မအံတစ်ခါ၊ အံတစ်ခါနှင့်၊
မျက်နှာတပါး၊ စာတခြားလည်း၊
စကားပြောဟော၊ တသောသောသည်၊
ရယ်မော၍လည်း မနေနှင့်။
၄၆။ မပြတ်အသံ၊ တညံညံသည်၊
စာအံစာဖတ်၊ ကြပ်ကြပ်မြဲမြဲ၊
သည် လဲ ညသတ်၊ ပြတ်ပြတ်သားသား၊
စကားဆိုထွေ၊ ပီလှစေ။
{၁၉၈၃ ခု-နိုင်ငံတော် သံဃမဟာနာယကအဖွဲ့ဗုဒ္ဓဘာသာ ယဉ်ကျေးမှု စာမေးပွဲ သင်ခန်းစာမှ
   ကူးယူရေးသားပူဇော်ပါသည်။ }
    (မှားယွင်းမှုများရှိသော် အစဉ်သနားသောအားဖြင့် သည်းခံခွင့်လွှတ်ပေးပါရန်
                    ဦးခိုက်လျှောက်ထားပါသည် ဆရာတော်အရှင်သူမြတ်ဘုရား)

     ဦးသိန်းဝေ။
           http://www.facebook.com/damanadi.tk
          http://www.damanady.tk/ (ဓမ္မနဒီ)တွင်လည်း ဖတ်ရှုနိုင်ပါသည်။